Sunday, October 30, 2011

වීරයානෙනි ඔබට නිවන් සුව...


මේ ගැන මම බ්ලොගයේ දැම්මේ නැත්තම් ඒක විශාල අඩුවක් වගේ.ඔබ අපි කවුරුත් හදුනන ටයි මාමා නොහොත් ටයිටස් තොටවත්ත මහතා මේ මාසේ 15 වෙනිදා සදහටම අපෙන් සමුගෙන යන්න ගියා.ඒ බව ඔයලා කවුරුත් දන්නවා ඇති.

දොස්තර හොඳහිත, පිස්සු පූසා, හා හා හරි හාවා, ගලිවර්ගේ සුවිසැරිය, රොබින් හුඩ්, කුංෆු, ඔෂින්, පුංචි ඉත්තෑවා, සුරඟන කතා කරළිය(පිනෝකියෝ, හිම කුමරිය, ජැක් සහ මායා බෝංචි වැල, සුරූපී විරූපී, ඇලඩින් සහ පුදුම පහන.... ), හසරැළි රසාර, පුංචි ඇත් පැටියා, ලන්ඩනයේ අතරමංව, මනුතාපය, මොන්තක්‍රිස්තෝ සිටුවරයා, යවෙස්ලූ මිනිසා වගේ විශිෂ්ට නිර්මාණ එතුමා අපිට දායාද කලා.


මේ දේවල් අපිට කවදාකවත් අමතක වෙන්නේ නැහැ ටයි මාමේ ඒ වගේම ඔබත් අපිට කවදාකවත් අමතක වෙන්නේ නැහැ.ඔබ සදා අමරණීයයි මාමේ.අපේ පුංචි කලේ සුන්දර කෙරූ ඔබ අද අපි අතරින් සමු අරගෙන ගිහින්.නැවත එන්න ටයි මාමේ ඒ ඔබ කල සේවයට සමාන සේවයක් කිරීමට වර්තමානයේ කවුරුත් බිහිවේ යැයි යන්න සැක සහිත නිසා.


ළමා කාලයක් අපිට දුන්නාට...
අපේ හිතේ කලාවට ඇල්මක් ඇති කලාට...
දූපතක හිටපු ළමයින්ට ලෝකයක් දෝත පුරා
ආලින්දයට ගෙනාවට...
හිනාවෙන්න,අඩන්න,සංවේදී වෙන්න කියා දුන්නාට...
අපේ පරිකල්පනය දියුණු කරලා අපිට හෙටක්
ගැන ලස්සනට හිතන්න ඉගැන්නුවාට....
ගොඩක් ස්තූතියි ටයි මාමේ...!!!
ටයි මාමා නැවත එනතුරු අපි අපේ අනාගත
පරපුර එක්කම බලා හිදිනවා.....
අපේ වීරයෝ කවදාකවත් මැරෙන්නේ නැති නිසා
ඉක්මනටම නැවත එනවා නේද ටයි මාමේ...!!!



"හරියන්නෑ., හරියන්නෑ., ඕක නම් හරියන්නෑ.. කියල හිතෙනකොට මේ ලෝකේ කිසිම දෙයක් බෑයි කියල බෑ කිව්වේ ඔබයි.........!! 
පුංචි අපිව දියරකුස්ගෙන් බේරාගෙන හා හා හරි හාවත් එක්ක කැලේ මැදින් අතරමං නොවී එන්න අපිට පාර පෙන්නපු ගලිවර් ඔබයි........!!
සුට් බුට් එක ...කලිසම් ඇඳලා රෝල්රොයිස් එකේ ගමන් ගියාට නරක වැඩ කරලා සාජන්ට් මහත්තාගෙන් බේරෙන්න බැහැයි කියල අපිට කියල දුන්නේ ඔබයි.........!!
එදා පුංචියට හිටිය ගම්මිරිස් ඇට අද ලොක්කෝ කළේ ඔබයි ටයි මාමේ............!!
ෂෙරිෆ්ලා ගිස්බන්ලා එකතුවෙලා රොබින්හුඩ් මැරුව වෙලාවේ අපි හොඳටම ඇඩුවා......අද වාගේම..................!!
ඔබට තවත් ආයුෂ දෙන්න දොස්තර හොඳහිතටත් බැරිවෙන්න ඇති ටයි මාමේ.....!!
ඒත් ඔෂීන් වගේ ජීවිතය දිනන්න...,
එදා මැප් එක කැප්ටන් ලීච්ගේ අතට නොදී වයිටාත් එක්ක එකතුවෙලා ඔබ අපට බේරලා දුන් නිධානය තාම අපිගාව තියෙනවා ටයි මාමේ...."


ආදරණීය  ටයි මාමේ ඔබට නිවන් සුව....!!!!



"ඇපල් අයිෆෝන්, අයිපෑඩ්, අයිපොඩ් ආදිය දෑහටවත් දැක නැති, ඒවා ගැනීමට සිතීමටවත් නොහැකි උදවිය ස්ටීව් ජොබ්ස්ගේ පින්තූර තම ෆේස්බුක් ප්‍රොෆයිල් වලට දාගෙන ඉකි ගසමින් හඬමින් සිටි අයුරු අපි පසුගිය කාලයේ දුටිමු. ඒත් කුඩා කාලයේ අපිව කුල්මත් කළ නිර්මාණ බිහි කළ ටයිටස් තොටවත්තයන් අන්ත්‍රා වුන එක ගැන ඒ උදවියගෙන්ම සමහරුන් දන්නේවත් නොමැති වීමෙන් පෙනෙන්නේ අප ජාතිය කොතරම් බටහිර ගැති වී තිබේද යන්නයි. බෞද්ධයෙක් වී තම දිවියට බුදු දහම එකතුකරගත් ස්ටීව් ජොබ්ස්ගෙන්, අපිට වුනේ මෙරට ජාතික ධනය තම රටට අද්දවාගැනීම පමණි. එනිසාම, දෙනෝදාහක් ජනතාවගේ රසාස්වාදය වෙනුවෙන් තම ජීවිතයම ගත කළ ටයි මාමා වෙනුවෙන් සුපුරුදු පරිදි මූනුපොත් පි‍ටුවේ සටහනක් තබා ශෝකය පළ කිරීම පමණක් ප්‍රමාණවත් නොවේයැයි සිතුණි.


තම හෙළ වදනින් පිට‍රැටියන්ගේ සැකිළි රූ අපේම කළ, පොඩි දරුවා ප්‍රමෝදයට පත් වෙද්දී වැඩිහිටියා එමගින් ලෝකය ගැන අවබෝධයක් ඇති කරගන්නා නිර්මාණ බිහි කරමින් සිංහල කලා ලොව පුබුදුවාලූ මහා නිර්මාණකරුවාණෙනි, ඔබට අමා මහ නිවන් සුව ලැබේවා…! ජාතියේ සුවහසක් දරුවන්ගේ සිත් සතන් සතු‍ටු කළ පිනෙන්ම ඔබ නිර්වාණය අවබෝධ කරගන්නා තුරු සුගතගාමී වේවා…!"



උපුටා ගැනීම:-සිංහල බෞද්ධයා  Sinhala Buddhist 

හුග කාලෙකින්...



අප්පේ මේකේ තියෙන මකුලු දැල් තොගේ...ඉතින් ඔන්න පිස්සු පූසා මේ මකුලුදැල් තොගේ කඩලා දාලා ආයෙමත් කොටන්නයි සූජානම.ඔහොම ඉන්ට මේකේ මකුලු දැල් තොගේ කඩනකන්.පොඩි උදව්වකුත් ඕනා මේවා කඩන්න.මොකද මට තනියෙන් මේක සුද්ද කරන්න බෑනේ.


හරි හැමෝම බලනවා ඇති මම කොහේද අතුරුදහන් උනේ කියලා.මේ සමෙස්ටර් එකේ ෆයිනල් එක්සෑම් තිබ්බ නිසා තමයි මට කොටන්න බැරි උනේ.ඔන්න ඒ ඔක්කොම ඉවර කරලා අද තමා වෙලාවක් හම්බුනේ කොටන්න.මගේ උපන් දිනයට සුබපතපු හැමෝටම ස්තූතියි.පරන පෝස්ට් වලටත් රිප්ලයි කමෙන්ට් දාන්න බැරිඋනා වැඩ වැඩි නිසා.සමාවෙන්ට ඕනා.


යාලුවන්ගේ පෝස්ට් එකක් වත් කියවන්න හම්බුනේ නෑ මේ මාසේ.හෙමිහිට එක එක කියවන්නම්.එක්සෑම්,ඔන්ලයින්,එසයින්මන්ට්,ප්‍රොජෙක්ට් අපෝ.......මට මේවා එපා වෙලා තියෙන්නේ.ගොඩක් දේවල් තියේනවා කොටන්න.

පලි:යාලුවන්ට මාව අමතක වෙලා නෑනේ..???

Sunday, October 2, 2011

කේක් ඕනා කට්ටිය මේහෙට එන්න

දිනය :1990.10.02
ස්ථානය :ගාල්ල මහමෝදර රජයේ රෝහල
වේලාව :හරියටම මතක නැහැ


දැනට අවුරුදු 21 කට කලින් අද වගේ දවසක බෙන්තර ගගෙන් එහා සුන්දර දකුණු බිමේ කවුරුවත් නොදන්නා එක්තරා සිදුවීමක්.ඒ දවස අපේ පවුලේ කාටවත් අමතක නොවෙන දිනයක් වෙන්න ඇති.පවුලේ වැඩිමහල් පුතාට හා බිරිදට පුත්‍රයෙක් උපත ලැබුවා."තවත් යගම පරම්පරාවට කොලු පැටියෙක්"හැමෝම සතු‍ටු උනා.

උපතින් කොච්චර කැත උනත් උණහපුලු අම්මාට තමන්ගේ පැටියා වටිනවා සේම එම දයාබර අම්මා තමන්ගේ පුතාට අසීමිත ආදරයක් දැක් වූවා.ඒ වගේම තමා ඒ පුතාගේ තාත්තාත්,තාත්තාගේ සහෝදර සහෝදරියනුත් ඒ කොලුවාට බොහෝසෙයින් ආදරය දැක් වූවා.ඒ කොලුවාගේ ලොකු නැන්දා කොලුවාට නමක් හිතුවා.ඒ නමට හැමෝම කැමති උනා.ඉතින් ඒ කොලුවා එදා ඉදන් ලොකු නැන්දා දාපු නමින් රෙජිස්ටර් උනා.



පස්සේ කොලුවා නගරේ පාසලකට දැම්මා.දකින දකින හැමෝම
"කොලුවෝ උබ හොදට ඉගෙනගනින්..."
"කොලුවෝ උබ ඉගෙනගෙන හොද ලොකු මහත්තයෙක් වෙලා හොද රස්සාවක් කරපන්.."
යැයි පැවසූ විට කොලුවාට වෙනදා මෙන් හිතට ප්‍රශ්න ගොඩක් ආවා.


"මොකද මේගොල්ලෝ මට ඉගෙනගන්නම කියන්නේ...??"තව තව ආපු ප්‍රශ්න ඒ කොලුවාට මතක නැත.


ඒ කොලුවාට තවත් මල්ලිලා දෙන්නෙක් හම්බුනා.ගෙදර සහෝදරත්වයෙන් පිරී ඉතිරී ගියා.තුන් දෙනාම එක කාමරේ දමා සහෝදර බැදීම ඒ දෙමපියන් ඒ කොලුවෝ තුන් දෙනාට කියලා දුන්නා.එක කාමරේ,ඇදවල් දෙකක් එකට තියලා නිදා ගනිද්දී,එක අල්මාරිය තුනට බෙදලා,එක පොත් මේසේ තුනට බෙදලා පාඩම් කරද්දී ඒ තුන් දෙනාගේ සහෝදර ප්‍රේමය තුන් දෙනාම අදුර ගත්තා.



ඉතින් කවුද මේ කොලුවා??


"කවුරු උනත් අපිට මොකෑ බං..??"


"නෑ බං පොඩ්ඩක් හොයලා බලන්න එපැයි මොකාගෙද උපන්දිනේ කියලා..!!"


උපන් දිනේ...කවුද කිව්වේ උපන්දිනේ කියලා..??


තව එකෙක් "ඔය උඩින් කියලා තියෙන්නේ කේක් ඕනා කට්ටිය මෙහෙට එන්න කියලා.උගෙන් කේක් කෑල්ලක් වත් ඉල්ල ගන්න ඇහැකිනේ..."



අහ් කේක් කිව්වමයි මතක් උනේ.අද මගේ උපන්දිනේ නේද බොලව්...


ඔයැයිලාට කේක් ඕනෙයි..???


නොදුන්නොත් මට මෙතන ඉන්න හම්බෙන්නේ නැහැනේ...හි හි...එහෙනම් මෙන්න කේක්.බෙදා හදාගෙන කන එකයි තියෙන්නේ.


ඈ බොල පිස්සු පූසට 21යි ද..??


"ඔය කියන්නේ..!!!"



"අපිට කේක් විතරක් මදී.."


"තව මොනවද බොල ඕනා..??"


"සැර ජාති එහෙම නැද්ද? ;)"


"තියෙනවා දෙන්නම් බොලාට මුල්ල පටස්...දේශීය නිෂ්පාදන.."


"එලකිරි..සිය රටදේ සිරි සැපදේ.."





පලි :මුල්ල පටස් සදරුගේ හිස් අහසින් උපුටා ගැනීමකි.මේ වි්‍යාපාරයට සදරුගේත් මගේත් කිසිදු සම්බන්දයක් නොමැත.


මෙය මුදල් ගෙවා ප්‍රචාරණය නොකල දැන්වීමකි!

පපලි :අනතුරු දායකයි.ප්‍රවේසමින් පරහරණය කරන්න.සිදුවන අතුරු ආබාධ ගැන වගකියනු නොලැබේ.